早兩日參加咗由復康會主辦、太古地產贊助嘅《無障樂悠游》義工活動，主要係幫輪椅使用人士體驗水上活動嘅快樂。原本以為只係一個普通嘅夏日義工體驗，點知喺淺水灣遇上咗「小明」，同佢過咗一個充滿笑聲、香港回憶與感動嘅午後。
❚ 以為只是去玩，原來是 8 比 1 的強大支援
我會報名參加呢個活動，純粹係覺得個題目幾得意，其實事前冇認真研究過自己實際會做啲乜。
當日一早去到淺水灣 Club One 會所，等大會口中嘅「參加者」（即輪椅使用者／行動不便人士）陸續到場。嚟到現場先知道，原來參加者同義工嘅比例好誇張：每一位參加者都有四個消防/救護義工，再加四個非消防義工，即係 8:1 嘅黃金支援陣容。
嚟咗一個鐘，聽完針對義工嘅 briefing 之後，終於等到我嘅參加者現身。我哋姑且叫佢做「小明」。
❚ 遇見小明：橫跨半個世紀的香港記憶
小明係一個一年幾前中過風嘅人。當時佢同家姐去深圳玩，點知不幸中風。好彩身上帶備現金六千幾蚊，先有醫院收留。喺醫院昏迷咗三日之後，佢仔仔北上深圳接返呢個迷迷糊糊嘅媽咪返香港。小明話，當時佢覺得呢個男仔（佢個仔）有啲面善、應該係可靠嘅，於是就翹住佢手臂一齊返香港。
中風之後，小明行動變得不便，眼睛逐漸怕光，亦不太想見朋友。因為佢年紀未到七十，身邊嘅朋友都行得走得，如果同佢哋出去玩或去旅行，心裏總覺得自己係個累贅。
過往幾十年嘅人生經驗，突然間變成一片空白，只係靠時不時閃現嘅畫面，或者透過同其他人嘅溝通，先至會拼湊返佢以前嘅回憶。而家嘅佢，即使同人傾偈，一開始可能都會係比較懵懂嘅狀態，要由身邊嘅人帶引先會提返起。
喺輕食同面對面交談嗰 45 分鐘內，我同小明有一種一見如故嘅感覺。
小明問我喺邊度做嘢，我同佢講我係太古嘅員工（費事複雜成件事）。佢一聽到「太古」兩個字，眼睛即刻放光。
佢話佢後生嘅時候（約九十年代），曾經有五年左右喺港島一間地產公司打工，專賣太古城嘅樓。當時佢對太古城所有樓宇嘅名、各個單位嘅尺數同座向都記得滾瓜爛熟。唔止做經紀賣樓，佢仲同我分享幫有錢人排隊買太古城嘅經歷 —— 當時買樓唔係抽籤，係先到先得。佢帶住一行十個姨媽姑姐空群而出，排咗三日三夜，最後每人淨袋三千蚊。
閒談之間，發現小明同我嘅人生有更多嘅重疊。
佢十六歲嗰年第一份工係喺柴灣電子廠返工，因為做得好，俾人挖角過檔。於是佢帶咗一班朋友仔，改去黃竹坑嘅電子廠打工。當時由柴灣去黃竹坑係坐「白牌車」，一蚊一個人，夠五個人就開車。佢同我講，當時朋友嘅人工係六百幾蚊，但佢醒目，人工多啲，有 740 蚊一個月。
我同佢講：「噉啱嘅，我都喺黃竹坑返工喎。」佢即刻笑不攏嘴。
我再同佢分享，其實我而家轉咗工幫手睇酒店。小明眼睛又發光，再同我分享佢嘅工作經歷。
小明問：「你識唔識XX酒店啊？好嘢嚟㗎！我當時喺佢嘅西餅餅房度打工，著住短裙仔，日日都有數之不盡嘅西餅食，食到唔想食添！唔止有西餅，仲有朱古力，都係我哋病房包辦！」
閒時佢仲可以帶朋友去食酒店嘅自助餐。因為同所有員工都混得好熟，佢一個人帶三個朋友嚟食自助餐，嗰邊淨係收佢一個人錢，即係買一送三！
講下講下，小明又記起怡東之後去咗某酒樓做收銀，又做咗五年；先再轉行去港島區嘅公立醫院工作，做咗三十年直到退休。
至於喺醫院做咩呢？根據佢嘅描述，小明話佢做指揮嘅工作，一個人要記百幾個同事嘅名，然後指揮大家去做嘢。例如一有直升機送病人嚟，要有八個人去接機，如果叫唔夠人，佢自己都會衝埋上去。
佢又同我分享，有次殮房要處理一個六百幾磅嘅泰國女性，但體型太大塞唔入雪櫃。佢就衝落去幫手，自作主張拆咗殮房中間嘅層板，再用層板托住病人滑入去。不過第二日俾殮房啲人大鬧一餐，話佢多此一舉。
但對佢嚟講，最深刻印象嘅係南丫島沉船事件。佢話好記得嗰日係 10 月 1 號，佢咁啱當更。因為醫院接收咗好多傷者，加上紅日唔夠人，佢做到手忙腳亂。同時間，佢得知船上遇難者有好多醫護同僚及家屬。喺壓力與傷感之下，嗰一日令佢畢生難忘。
閒談之間，我發現小明係一個好潮、好有趣，又好勇敢面對新事物嘅人。
佢話喺醫院工作時，當時冇乜人識打中文，但佢識打當時嘅「五碼」（倉頡），因為打字快而受到賞識，勝任控制室嘅工作。我又同佢即刻 High-Five，因為我哋兩個都係倉頡人。
佢又同我講佢好鍾意去旅行。後生喺醫院做嘢嘅時候，試過請 20 幾日假去歐洲旅行。佢話去歐洲咁遠又搞咁多簽證，唔去耐啲點得！當時醫院嘅老闆又好抵得諗，放佢去周圍玩。
❚ 重返淺水灣：準備充足的「小明陛下」
講返今日嘅活動，主要係幫行動不便嘅人士去沙灘玩水。小明喺社工姑娘慫恿下報名，未落水前我講佢非常期待。
小明後生嘅時候係自學游水（蛙式），唔單止自學，仲周圍教唔識游水嘅朋友，甚至四十歲先教佢家姐游水。佢好驕傲咁分享，佢教出嚟嘅朋友係可以游到渡海泳嘅（雖然佢自己未試過）。佢二十歲出頭就考咗車牌，成日揸車去沙灘游水，而今日活動嘅淺水灣，正正就係佢後生時經常去嘅泳灘之一。
佢對於今日嘅活動既興奮又緊張，因為佢話已經好多年冇嚟過淺水灣，更何況係中風之後呢。未落水之前，佢好期待咁同我分享佢諗住點樣去游水，只係我當時冇同佢講，今日玩水嘅方式可能同佢想像嘅有啲唔同。
終於到了落水環節。我哋一齊花咗 10-15 分鐘聽完復康會嘅 briefing，了解沙灘輪椅嘅使用方法。小明被我哋呢群緊張嘅義工「五花大綁」咁綁喺沙灘輪椅上面。然後，我哋徐徐滑入大海。
小明話：「好正呀，我好似坐緊個八人花轎！」
❚ 泰國潑水節海上版：小明陛下的水槍大反擊
雖然使用者唔可以好似以前咁樣盡情喺海中自由游水，但係我哋被分配到一啲沙灘玩具，主要係水槍同埋水炮。
喺呢個短短 45 分鐘嘅水上活動入面，我哋嗰組嘅四位消防員哥哥就係體力擔當，而我同 Anita 就成為咗小明嘅「卒仔」。
小明陛下真係好鍾意玩！佢坐住呢架戰車，一句「衝呀」，消防員們就會拉住架戰車衝去其他使用者嘅戰車附近，再發施號令叫我哋去攻擊（潑水）。小明陛下總會不停咁點我同 Anita 幫佢嘅水槍裝水。
潑水得如火如荼之際，小明陛下見到有個男仔行近，佢攞水槍指住人哋個頭：「你係邊個？係咪自己人嚟㗎？」好彩嗰位男士即刻表明「係自己人」，如果唔係，佢一定俾小明陛下射到耳仔都入水。
❚ 抹走鹽分與淚水：無障樂悠游的真正意義
45 分鐘之後，終於上水結束呢個「泰國潑水節海上版」。我哋嘅乾身義工即刻同小明講：「我哋攞你部電話影咗好多相同埋片段啦，你可以攞返去同你啲朋友威威啦。」
喺前往更衣室嘅路上，小明喺我耳邊同我講：
「雖然玩法同我想像唔一樣，但我今日仍然好開心，我覺得自己好似變得好細，成個細路咁。同埋玩緊嘅時候，我已經唔記得自己係有缺陷嘅人⋯⋯」
佢講嗰句嘢嘅時候，我擰轉頭望佢。佢用嘅沙灘巾抹走面上海水嘅同時，我隱約見到佢用沙灘巾抹走臉上其他帶鹽嘅水分。
聽到佢咁講，我都好感動。覺得自己呢個五個半鐘頭嘅義工活動，雖然只係得 45 分鐘玩水，但其實都好值得。
原來《無障樂悠游》呢個名，唔係口號，係我哋當日真係一齊經歷過嘅嘢。
❚ 後記與活動資訊
這次活動由 香港復康會 主辦、太古地產 贊助，和消房署提供大量義工。如果你也想參與或支持這樣有意義的無障礙水上體驗，歡迎關注復康會的最新消息！
💡其他跟 #日常 相關的文章推介：
– 2025年最熱的4個月，我完成了《全城街馬》12節跑步班
– 幾經掙扎才推介的護髮好物：資生堂 Auslese Hair Tonic
– 打字速度和語言學習——我的生產力反思
~~ 如果你覺得這篇文章對你有幫助，請在下面點個讚👍🏻，謝謝! ~~
